Námskeið í skipulagi hafsvæða við Háskólasetur Vestfjarða

David Goldsborough

Dagana 2.–13. mars stendur yfir námskeiðið Hafskipulag við Háskólasetur Vestfjarða.

Á námskeiðinu er sjónum beint að einu af stóru viðfangsefnum samtímans á hafsvæðum: hvernig hægt sé að samræma ólíka nýtingu hafsins á sjálfbæran og skynsaman hátt. Undanfarin ár hefur hugtakið bláa hagkerfið orðið æ meira áberandi á heimsvísu, þar sem strandríki horfa í vaxandi mæli til hafsins þegar kemur að atvinnusköpun og efnahagslegum tækifærum. Slík þróun kallar þó jafnframt á vandaða stjórnun og skipulag.

Í námskeiðinu kynnast nemendur ferli skipulags hafsvæða og skoða hvaða hagsmunaaðilar gera kröfur um rými á sjó, hvar þær kröfur koma fram og hvaða laga- og stefnumótunarrammar hafa áhrif á ákvarðanir. Til að gera viðfangsefnið sem raunverulegast taka nemendur einnig þátt í sérstökum hermileik þar sem þeir fara í hlutverk raunverulegra hagaðila og þurfa að finna pláss fyrir 10 GW af vindorku í hollenska hluta Norðursjávar.

Námskeiðið veitir ítarlega innsýn í skipulag hafsvæða frá hagnýtu sjónarhorni. Fjallað er um fjölbreyttar niðurstöður sem slíkt skipulag getur skilað, verkfærin og aðferðirnar sem notaðar eru í ferlinu, sem og styrkleika þeirra og veikleika. Þá eru raunveruleg dæmi víða að úr heiminum nýtt til að tengja saman fræði og framkvæmd.

Að námskeiði loknu eiga nemendur að hafa öðlast betri skilning á helstu þáttum skipulags hafsvæða, mismunandi niðurstöðum slíks skipulags og þeim aðferðum sem beitt er í ferlinu. Jafnframt fá þeir þjálfun í gagnrýninni hugsun og efla færni sína í skriflegri og munnlegri miðlun.

Kennari námskeiðsins er David Goldsborough, rannsakandi og lektor í hafstefnu við Van Hall Larenstein í Hollandi. Hann hefur bakgrunn í umhverfisfræði og kennir meðal annars skipulag hafsvæða, verndun líffræðilegrar fjölbreytni og sjálfbærar fiskveiðar. Hann er jafnframt virkur þátttakandi í sérfræðihópum á vegum Alþjóðahafrannsóknaráðsins (ICES), þar sem rannsóknaráherslur hans snúa að samspili vísinda, stefnumótunar og framkvæmdar í vistkerfismiðaðri stjórnun hafsvæða.

David segir eitt það skemmtilegasta við kennsluna vera samskiptin við nemendurna:

Lestu meira um námskeiðið hér.

Við minnum á að öll meistaranámskeið sem kennd eru við Háskólasetur Vestfjarða eru opin þátttakendum jafnt frá háskólum sem atvinnulífi. Hafir þú áhuga á að sækja stök námskeið hjá Háskólasetri getur þú kynnt þér kennsluskrána okkar og sent inn umsókn um stakt námskeið.