Háskólasetur Vestfjarða, UW, er minnsta stofnun sem starfar á háskólastigi á Íslandi. Það býður upp á tvær meistaranámsleiðir en hefur til þess gert samning við Háskólann á Akureyri um fullgildingu náms.
Háskólasetrið býður upp á sumarnámskeið og þjónustu fyrir vettvangsskóla, sem koma til Vestfjarða allt frá fáeinum dögum að nokkrum vikum. Háskólasetur Vestfjarða hefur gert umfangsmikinn samning við World Learning/SIT háskóla í Vermont/BNA og hýsir meistaranámsleið SIT.
Á hverjum tíma eru um 70-80 nemendur á Ísafirði á vegum Háskólaseturs.
Fyrir alla þá Vestfirðinga sem eru í fjarnámi við innlendan eða erlendan háskóla er Háskólasetrið fjarnámssetur sem veitur þeim þjónustu, aðallega lesaðstöðu og prófþjónustu. Í gegnum fjarnámið sækja Vestfirðingar menntun án þess að þurfa að flytja úr heimabyggð sinni.
Háskólasetur Vestfjarða hefur byggt upp víðtækt tengslanet og þjónustar bæði innlenda sem erlenda rannsóknarmenn sem starfa á sviði rannsókna á Vestfjörðum. Þó Háskólasetrið sé ekki skilgreind sem rannsóknarstofnun, hafa rannsóknir verið sá þáttur starfseminnar sem hefur vaxið hvað mest á síðustu árum.
Háskólasetur Vestfjarða er stærsta stofnunin í Vestrahúsinu á Ísafirði og leiðandi í samstarfi stofnana í rannsóknaklasa Vestfjarða.
Háskólasetur Vestfjarða var stofnað af Vestfirðingum með það í huga að efla Vestfirði og hefur það verið leiðarljósið í gegnum árin.