Íslenskunám í heimabyggð – tækifæri fyrir Vestfirðinga
Háskólasetur Vestfjarða (HV) tekur þátt í samstarfsverkefninu „Máltæknikjarni“, sem unnið er í samstarfi við Háskóla Íslands. Markmið verkefnisins er að þróa nýjar og skilvirkar leiðir til tungumálanáms, sem eru hagkvæmar og aðgengilegar óháð búsetu. Hluti af þessu verkefni tengist sérstaklega Vestfjörðum og starfsemi HV.
Í því samhengi má nefna fjarkennslu í íslensku sem öðru máli sem sinnt er af Ólafi Guðsteini Kristjánssyni, kennara við Háskóla Íslands, sem starfar frá Ísafirði. Hann er gjarnan til staðar í Háskólasetri Vestfjarða og geta nemendur átt þar persónuleg samtöl við kennara – sem er sjaldgæft forskot í fjarnámi. Þetta er gott dæmi um nútímalegt nám án staðsetningar.
Í ljósi þeirra miklu samfélagsbreytinga sem orðið hafa á undanförnum árum er sífellt aukin þörf fyrir fjölbreytt og vandað nám í íslensku sem öðru máli. Háskóli Íslands býður bæði staðnám og fjarnám í íslensku sem öðru máli með ýmsum námsleiðum, þar á meðal hagnýtu námi sem lýkur með grunndiplóma (60 einingar). Fjarnámið hentar sérlega vel fyrir fólk búsett á landsbyggðinni – eins og á Vestfjörðum – sem vill ná góðum tökum á íslensku.
Nemendur sem ljúka grunndiplómanáminu ættu að geta staðið vel að vígi í daglegum samskiptum á íslensku. Margir fyrrverandi nemendur hafa lýst náminu sem öflugum stökkpalli í máltileinkun, en árangur ræðst þó ávallt af áhuga og einurð hvers og eins. Fjölmörg dæmi eru um að fólk sinni þessu námi samhliða vinnu með góðum árangri.
HV gegnir einnig lykilhlutverki fyrir nemendur á svæðinu með prófahald og hagnýta aðstoð. Þá er kennari HÍ, Ólafur Guðsteinn Kristjánsson, sem fyrr segir staðsettur á Ísafirði og aðgengilegur nemendum sem vilja fá ráðgjöf eða beina fyrirspurnum til hans. Best er að senda honum fyrirspurn á netfangið: olafurgk@hi.is
Við hvetjum Vestfirðinga til að kynna sér þessi tækifæri og nýta sér þau – aldrei hefur verið auðveldara að læra íslensku í heimabyggð.
Umsóknarfrestur fyrir umsækjendur með íslenska kennitölu og búsetu á Íslandi er 20. maí.
Nánari upplýsingar um námið má finna hér: