Hér má nálgast námskeiðslýsingar allra námskeiðanna sem í boði eru. Einnig má sjá skipulag námsins í sameiginlegri kennsluáætlun Sjávarbyggðafræði og Haf- og strandsvæðastjórnunar.
Námskeiðin uppfylla kröfur ýmissa stéttarfélaga um námsstyrki. Vor- og sumarannir eru tilvaldar fyrir háskólanemendur sem vilja stytta námstímann í reglubundnu námi.
Fyrirspurnir sendist á kennslustjóra Háskólaseturs.
Opinber stefnumótun – frá hugmynd til aðgerða
- Autumn 2026
- Kennari: Dr. Josefina Syssner
Um námskeiðið
Námskeiðið veitir nemendum innsýn í það ferli hvernig hugmynd eða þörf fyrir opinbert inngrip getur orðið að stefnu í framkvæmd. Stefnumótunarferlið er skoðað með áherslu á kenningar um málefnasetningu (e.sv. agenda-setting), þ.e. hvernig mál kemst á dagskrá stjórnvalda og hvað skýrir hvers vegna mál nær stundum fram að ganga en stundum ekki. Einnig er fjallað um ólíka þætti stefnumótunarferlisins: skilgreiningu vandamála, málefnasetningu, mótun stefnu, framkvæmd og ábyrgðarskyldu. Litið er til ólíkra sjónarmiða og hagsmuna er varða skilvirkni, jöfnuð, frelsi einstaklingsins og félagslega samheldni þegar markmið opinberrar stefnumótunar eru skilgreind. Nemendur öðlast innsýn í þær aðferðir sem stjórnvöld beita til að ná markmiðum sínum með því að fjalla um hin ýmsu stjórntæki.
Kennslan fer fram í formi fyrirlestra, gagnvirkra tíma og vettvangsferðar. Raunveruleg dæmi sem rædd eru í tengslum við stefnumótunarferlið beinast að svæða- og byggðaþróun með sérstakri áherslu á áskoranir strandsamfélaga.
Kennari
Josefina er rannsakandi og prófessor í mannvistarlandfræði við Center for Local Government Studies við Linköping-háskóla. Rannsóknir hennar beinast einkum að staðbundinni stefnumótun, skipulagsmálum og þróun á Norðurlöndum, sérstaklega á svæðum sem einkennast af miklum vegalengdum, minnkandi íbúafjölda og öðrum landfræðilegum áskorunum.
Kennsluskrá
Að námskeiði loknu skal nemandi
- hafa hæfni til að tengja svæða- og byggðastefnu við alþjóðlegt samhengi (eða hnattrænt sjónarhorn).
- geta greint helstu kenningar á sviði opinberrar stefnumótunar, lýst hinum ýmsu stigum stefnumótunarferlisins og útskýrt hvernig það virkar.
- geta greint og lýst helstu ólíku sjónarmið og hagsmuni innan ólíkra geira samfélagsins þar sem opinber stefnumótun spilar hlutverk.
- geta greint og skilgreint helstu gerendur í stefnumótunarferlinu.
- geta borið saman ólík einkenni hinna ýmsu stjórntækja og stillt þeim upp andstætt hvoru öðru um leið og áhrif þeirra á efnahag og félagslega hegðun eru metin.
- hafa hæfni til að kynna og útskýra niðurstöður úr fræðigreinum og stefnuskjölum og ræða þær við samnemendur.
- hafa þróað með sér gagnrýna hugsun, auk skriflegrar og munnlegrar tjáningarfærni.