Hér má nálgast námskeiðslýsingar allra námskeiðanna sem í boði eru. Einnig má sjá skipulag námsins í sameiginlegri kennsluáætlun Sjávarbyggðafræði og Haf- og strandsvæðastjórnunar.

Námskeiðin uppfylla kröfur ýmissa stéttarfélaga um námsstyrki. Vor- og sumarannir eru tilvaldar fyrir háskólanemendur sem vilja stytta námstímann í reglubundnu námi.

Fyrirspurnir sendist á kennslustjóra Háskólaseturs.

Umhverfishagfræði

Autumn 2026
Kennari: Dr. David Cook

Um námskeiðið

Í þessu námskeiði fá nemendur innsýn í umhverfis- og auðlindahagfræði og þau stjórntæki sem notuð eru við gerð opinberrar stefnumótunar á haf- og strandsvæðum og við sjálfbæra þróun. Kynntir verða grunnþættir staðlaðra hagfræðilegra greininga (nýklassísk hagfræði) sem og aðrar nálganir, s.s. visthagfræði. Lögð er áhersla á hvernig stuðla má að heilbrigðu vist- og hagkerfi auk þess að útvega nemendum nauðsynleg verkfæri til að leggja mat á markmið og taka ákvarðanir í tengslum við umhverfis- og auðlindastjórnun á haf- og strandsvæðum.

Kennari

Dr. David Cook:

David er aðjúnkt við Háskóla Íslands og tengist námsleiðinni Umhverfis- og auðlindafræði. Rannsóknir hans beinast að tengslum hagkerfa og velferðar fólks, með sérstakri áherslu á verðmat vistkerfisþjónustu á norðurslóðum. Hann starfar einnig sem kennari í umhverfishagfræði við Háskóla Íslands.

Árið 2018 lauk hann doktorsprófi í umhverfis- og auðlindafræði við Háskóla Íslands. Doktorsverkefni hans snerist um þróun hagfræðilegs líkans til að meta umhverfiskostnað vegna nýtingar jarðhita.

Nemendur við Háskólasetur Vestfjarða eru alltaf áhugasamir og tilbúnir að kynna sér og takast á við hugtök námskeiðsins, óháð því hversu mikla reynslu þeir hafa áður af hagfræði. Það þarf því litla hvatningu til að fá þá til að hugsa á gagnrýninn hátt.

Kennsluskrá

Að námskeiði loknu skal nemandi:

hafa skilning á því hvernig markaðsbrestur getur átt sér stað á mismunandi hátt og geta íhugað það í tengslum við haf- og strandsvæði.
vera fær um að beita kenningum í umhverfishagfræði og mismunandi stefnumótunarverkfærum.
skilja framkvæmd og afleiðingar kostnaðar- og ábatagreiningar, þar á meðal í tengslum við loftslagsbreytingar.
sýna fram á þekkingu og hagnýta kunnáttu á matsaðferðum við mat á þáttum utan markaðar til að meta umhverfisáhrif og miðla slíkum upplýsingum með könnunum, skýrslum og kynningum.
vera fær um að þróa, skipuleggja, gera uppkast, endurbæta og ljúka við skriflegt rannsóknarverkefni.
skilja áhrif umhverfis- og auðlindahagfræði hvað varðar hafskipulag og sjálfbæra þróun.

Til baka í lista