Dr. Brad Barr, sem lengi hefur kennt við Háskólasetur Vestfjarða sem fastur gestakennari í haf- og strandsvæðastjórnun, er nú staddur á Ísafirði í öðrum erindagjörðum en venjulega. Þessa dagana sinnir Dr. Barr rannsóknarverkefni þar sem hann kannar varðveislu og ástand hvalveiðistöðva á Íslandi. Verkefnið er styrkt af Fulbright stofnuninni á Íslandi og er hluti af Fulbright National Science Foundation rannsóknastyrkjum til rannsókna á sviði málefna norðurslóða. Í verkefni Dr. Barr er sjónum beint að því að kortleggja ástand sögulegra minja um hvalveiðar á Íslandi. Einnig verða settar fram tillögur að því hvernig megi varðveita minjarnar og túlka þær.   

Þessar sögulegu hvalveiðistöðvar á Íslandi eru staðsettar á Vestfjörðum og Austfjörðum og voru þær flestar starfandi undir lok 19. aldarinnar og í byrjun 20. aldar. Eða allt fram að því að íslensk yfirvöld settu á hvalveiðibann árið 1915. Hafsvæðið í kringum Íslands var búsvæði fremur stórra hvalastofna, rétt eins og það er í dag, og vakti því athygli fjölmargra hvalveiðifyrirtækja við norðanvert Atlantshaf á þessum tíma. Þótt flestar hvalveiðistöðvarnar hafi veitt vel, og verið árangursríkar á þann hátt, skera þær sig úr vegna þeirra tækniframfara sem áttu sér stað í þeim á fremur stuttum tíma. Þessar tækniframfarir má segja að hafi breytt gangi sögunnar og því er um afar mikilvægar minjar að ræða.

Dr. Brad Barr hefur dvalið á Íslandi frá því í byrjun apríl og hefur haft aðsetur við Stofnun Vilhjálms Stefánssonar á Akureyri á meðan hann beindi sjónum sínum að hvalveiðistöðvum á Austfjörðum. Nú hefur hann fært sig úr stað og heldur vinnunni áfram við Háskólasetrið á meðan hann kannar þær stöðvar sem eftir eru en þær eru allar á Vestfjörðum. Í júní mánuði mun Dr. Barr rannsaka u.þ.b. tíu hvalveiðistöðvar. Að rannsókninni lokinni verða niðurstöðurnar afhentar íslenskum yfirvödum til að aðstoða þau við að varðveita þessar mikilvægu minjar.