Nýr starfsmaður Háskólaseturs

Fyrsta nóvember síðastliðinn hóf Ingi Björn Guðnason störf hjá Háskólasetri Vestfjarða. Ingi Björn er verkefnastjóri og mun til að byrja með hafa umsjón með uppbyggingu nýrrar vefsíðu Háskólaseturs. Hjá Háskólasetri er í uppbyggingu frumgreinanám og ný námsleið á mastersstigi í Haf- og strandsvæðastjórnun, í því samhengi var nauðsynlegt að hugsa vefsíðuna í stærra samhengi en hún er hönnuð af Ágústi Atlasyni hjá Snerpu. Ingi mun í framhaldinu einnig sinna almannatengslum sem og námsmannakomum, námskeiðum og ýmsu öðru. Hann er bókmenntafræðingur að mennt og er að ljúka MA-prófi frá Háskóla Íslands en lokaritgerð hans fjallar um skáldsögur Jóns Kalmans Stefánssonar.

Málþing um hafrannsóknir

Átta vísindamenn frá stofnuninni Villfiskforum í Noregi eru nú í heimsókn hjá Háskólasetri Vestfjarða. Miðvikudaginn 31. október verður málþing um hafrannsóknir í Háskólasetrinu í tilefni af komu Norðmannanna.

Óbeisluð fegurð

Umfjöllunarefnið í Vísindaporti vikunnar er óhefðbundið að þessu sinni en gestur vikunnar er m.a. Matthildur Helgadóttir, einn af forsprökkum fegurðarsamkeppninnar Óbeisluð fegurð. Óbeisluð fegurð er, eins og flestir vita, óhefðbundin fegurðarsamkeppni sem var haldin í félagsheimilinu í Hnífsdal þann 18. apríl 2007.

“Þorparar og þéttbýlismyndun”

Sigurður Pétursson sagnfræðingur heldur fyrirlestur sem hann nefnir “Þorparar og þéttbýlismyndun”í Háskólasetri, n.k. mánudag, þann 22. október kl. 20:00.

Náttúrutengd ferðaþjónusta

Gestur vikunnar í Vísindaporti er Ralf Trylla. Ralf er að vinna að meistararitgerð og er það ástæðan fyrir veru hans á Vestfjörðum. Hann mun kynna meistaraverkefnið sitt í Vísindaportinu, en það fjallar um ferðaþjónustu á Vestfjörðum og er rannsókninni sérstaklega ætlað að skoða náttúrutengda ferðaþjónustu á Vestfjörðum.

Ralf Trylla er stúdent við Háskólann í Wädenswil í Sviss en þar leggur hann stund á nám á sviði ferðamála- og umhverfisfræða. Hann kom til Ísafjarðar fyrir tveimur vikum og er því nýbyrjaður að vinna að verkefni sínu og því væri mjög gagnlegt fyrir hann að fá innsýn og athugasemdir frá sem flestum sem tengjast ferðaþjónustu á Vestfjörðum. Kynningin mun fara fram á ensku og hefst kl. 12. Vonast er til að sem flestir sem láta sig varða ferðamál á Vestfjörðum sjái sér fært að mæta og nýti sér tækifærið til að koma á framfæri athugasemdum og hugmyndum sem gagnast geta við vinnslu lokaverkefnis Ralfs.

Vísindaportið er óformlegur umræðutími í hádeginu á föstudögum þar sem einhver segir í stuttu máli, 20-30 mínútur, frá sínum núverandi eða eldri rannsóknum – og svo er orðið laust. Fyrirlesturinn fer fram í kaffisal Háskólasetursins og eru allir velkomnir.
Eldri færslur