Eftir langt sumarleyfi mun Vísindaport Háskólaseturs Vestfjarða hefja göngu sína á ný föstudaginn 16. spetember. Þá mun Sigríður Ólafsdóttir, umhverfisfræðingur kynna samevrópska fiskveiðistjórnunarverkefnið EcoFishMan. Sigríður er starfsmaður verkefnisins hér á landi fyrir hönd Háskóla Íslands en hún er stödd á Ísafirði þessa dagana við kennslu í meistaranámi í haf- og strandsvæðastjórnun. Erindið hefst í kaffisal Háskólaseturs kl. 12.10, það fer fram á ensku og er opið öllum.

Markmið EcoFishMan verkefnisins er að þróa og stuðla að innleiðingu nýrrar samþættrar fiskveiðistjórnunar í Evrópu sem byggir á aukinni þátttöku hagsmunaaðila. Um er að ræða sjálfbært, vistkerfismiðað stjórnunarkerfi þar sem gengið er út frá hámarks ásættanlegum neikvæðum áhrifum. Einnig er leitast við að finna leiðir til að koma í veg fyrir brotkast og viðhelda hagrænum og félagslegum lífvænleika sjávarbyggða. EcoFishMan er þverfaglegt verkefni sem byggir á vistfræðilegum, félaglegum og hagrænum viðmiðum. Þrettán stofnanir, fyrirtæki og háskólar frá átta ólíkum löndum taka þátt í verkefninu, þ. á m. Háskólinn í Tromsø og Háskóli Íslands. Fyrir þriggja ára tímabil hefur verið ráðstafað 3,7 miljónum evra í verkefnið og þar af koma 3 miljónir frá Evrópusambandinu.

Sigríður Ólafsdóttir starfaði sem fagstjóri meistaranáms í haf- og strandsvæðastjórnun við Háskólasetur Vestfjarða frá 2008-2009. Hún lauk M.Sc. prófi í umhverfis- og auðlindafræði frá Háskóla Íslands og B.Sc. gráðu í land- og jarðfræði frá sama skóla.