Í dag, föstudaginn 11. júní, luku hátt í 50 grunnskólakennarar á norðanverðum Vestfjörðum námskeiði sem hannað og undirbúið var af nemendum Háskólaseturs Vestfjarða í Haf- og strandsvæðastjórnun. Námskeiðið sem bar yfirskriftina „Menntun til sjálfbærni" fjallaði um sjálfbærni og leiðir til að samþætta hugmyndir um sjálfbærni inn í alla kennslu og allt skólastarf. Farið var sérstaklega yfir sjálfbærni í tengslum við mat, orku og úrgang, en einnig var fjallað um sjálfbærni í víðara samhengi, með aðstoð Kristínar Völu Ragnarsdóttur forseta verk- og náttúruvísindasviðs Háskóla Íslands. Í kjölfarið á fyrirlestrum í gærmorgun var svo unnið í hópum að hugmyndum um verkefni í tengslum við kennslu.

Námskeiðið þótti heppnast vel og veitti þátttakendum margar hugmyndir til að nota við undirbúning næsta skólaárs.