Laugardaginn 7. júní hélt Háskólasetur útskriftarveislu fyrir þá fjarnemendur sem eru að útskrifast úr sínu háskólanámi nú í vor.  Samkvæmt þeim upplýsingum sem fyrir liggja hjá Háskólasetrinu eru 19 manns að útskrifast þetta vorið.  Þar af eru 12 sem útskrifast frá Háskólanum á Akureyri (6 í grunnskólakennarafræði, 5 í hjúkrunarfræði og 1 í viðskiptafræði), 4 eru að fara að útskrifast frá Kennaraháskóla Íslands (2 í grunnskólakennarafræði og 2 í þroskaþjálfafræði) og 3 munu útskrifast frá Háskóla Íslands (1 með BA í íslensku, 1 með MS í næringarfræði og 1 í framhaldsnámi í félagsráðgjöf).

Þetta fólk hefur allt með einum eða öðrum hætti nýtt sér aðstöðu Háskólasetursins við háskólanámið þó í mismiklum mæli sé.  Háskólasetrið færði öllum útskriftarnemum gjöf með hamingjuóskum í tilefni útskriftarinnar en ekki síst með þökk fyrir samstarfið og samveruna á liðnum árum.  Öllum útskriftarnemum ársins er óskað velfarnaðar og starfsfólk Háskólaseturs óskar þess að sjálfsögðu að sem flestir komi nemendurnir aftur, annað hvort sem kennarar hjá Háskólasetri eða sem nemendur í framhaldsnámi á háskólastigi.

Á meðfylgjandi mynd má sjá hluta útskriftarnemanna ásamt Mörthu Lilju Olsen, kennslustjóra Háskólaseturs og Peter Weiss forstöðumanni.