Þann 17. júní síðastliðinn var mikið um dýrðir á Hrafnseyri við Arnarfjörð. Eins og alþjóð veit fór þar fram hátíðleg dagskrá og opnun nýrrar sýningar um Jón Sigurðsson í tilefni þess að tvö hundruð ár voru liðin frá fæðingu hans. Liður í hátíðarhöldunum var útskriftarathöfn meistaranema í haf- og strandsvæðastjórnun frá Háskólasetri Vestfjarða og Háskólanum á Akureyri. Þetta er annað árið sem slík athöfn er haldin í tengslum við hátíðarhöld á Hrafnseyri á 17. júní og jafnframt önnur útskrift meistaranema af námsleiðinni í haf- og strandsvæðastjórnun.

Í ár útskrifuðust þrettán nemendur með meistaragráðu í haf- og strandsvæðastjórnun. Námið er vottað af Háskólanum á Akureyri og námsgráðan gefin út af honum. Rektor HA, Stefán B. Sigurðsson afhenti nemendum prófskírteini og ávarpaði samkomuna. Í máli rektors kom m.a. fram hve fjölbreytt samstarf HA og Háskólasetursins er umfram sjálft meistaranámið einkum á sviði fjarnáms en tilraunaverkefni í fjarnámi í sálfræði var keyrt á Ísafirði síðastliðinn vetur.

Peter Weiss forstöðumaður Háskólasetursins tók einnig til máls. Hann beindi máli sínu til útskriftarnemanna og lagði áherslu á það hvernig sú menntun sem nemendur hafa öðlast á Ísafirði getur nýst þeim í framtíðinni.
Prófessorarnir Gabriela Sabau og Marc L. Miller ávörpuðu einnig samkomuna fyrir hönd kennara auk þess sem útskriftarnemendurnir Alan Deverell, Etienne Gernez og Petra Granholm komu fram fyrir hönd nemenda.