Ivan Nikonov nemandi í haf- og strandsvæðastjórnun hlaut í tengslum við brautskráningu sína „Grænu ritgerðarverðlaunin“ við Háskólann á Akureyri. Nemendur í haf- og strandsvæðastjórnun útskrifast formlega frá Háskólanum á Akureyri og eru því gjaldgengir í samkeppnina.

Verðlaunin voru sett á fót af Umhverfisráði og Kennslumiðstöð Háskólans á Akureyri til að auka magn grænna rannsókna meðal nemenda og heiðra nemendur sem taka sjálfbærni sem viðfangsefni inn í lokaritgerðir sínar.

Lokaritgerð Ivans fellur sannarlega vel að þessu enda snýst ritgerðin um að finna lausnir á fráveituvatni í fámennum og afskekktum byggðum á Íslandi. „Í þessum byggðalögum eru gjarnan litlar upplýsingar um samsetningu, dreifingu og magn fráveituvatns,“ segir Ivan. „Í ritgerðinni gerði ég tilraun á afmörkuðum svæðum við höfnina í Bolungarvík þar sem fráveituvatn rennur út í sjó. Mælingar voru gerðar á mengandi efnum og tilraun gerð með skólphreinsun þar sem þörungar voru notaðir.“ Mikil áhersla var lögð á sjálfbærni í verkefninu eins og Ivan útskýrir nánar. „Í fyrsta lagi var allur efniviður sem notaður var endurunnin, en það ánægjulegasta við tilraunina var að aðgerðin sýndi fram á umtalsverða minnkun köfnunarefnis í skólpinu.“ Ljóst er að verkefni Ivans getur gagnast víðar en í Bolungarvík. „Já, niðurstöðurnar og aðferðin sem er þróuð í rannsókninni getur gagnast víðar og er viðbót við þá þekkingu og tæknikunnáttu sem smærri byggðalög á Íslandi geta nýtsér til að bæta fráveitumál.“

Það er afar ánægjulegt fyrir Háskólasetrið að sjá lokaritgerð nemenda fá slíka viðurkenningu og færum við honum innilegar hamingjuóskir með þennan áfanga.