Mánudaginn 1. nóvember hófst námskeiðið Coastal and Marine Politics and Policy sem, eins og titillinn gefur til kynna, fjallar um stjórnmál og stefnumótun hvað haf- og strandsvæði varðar. Kennari námskeiðsins er Auður H. Ingólfsdóttir en hún hefur kennt þetta námskeið frá því meistaranámið í haf- og strandsvæðastjórnun hófst fyrir þremur árum.

Í námskeiðinu fá nemendur yfirlit yfir stefnumótunartæki opinberra aðila og hvernig þeim er beitt til að leysa málefni sem koma upp við stjórnun haf- og strandsvæða. Nemendur greina flókin málefni er varða stefnumótun og taka til umfjöllunar þá hagsmunaárekstra sem oft koma upp á milli ólíkra aðila um nýtingu haf- og strandsvæða, einkum hvað varðar skammtíma hagsmuni ákveðinna hópa gagnvart langtíma hagsmunum samfélagsins. Þá veitir námskeiðið einnig yfirlit yfir alþjóðasamninga, lög og reglugerðir sem snúa að haf- og strandsvæðum auk þess sem slíkt efni er sett í samhengi við lög og reglugerðir ríkja og sveitarfélaga.

Auður H. Ingólfsdóttir er lektor við Háskólann á Bifröst, hún lauk meistaranámi í alþjóðasamskiptum frá Fletcher School of Law and Diplomacy við Tufts háskólann í Boston í Bandaríkjunum. Hún vinnur nú að doktorsritgerð sem fjallar um öryggismál og loftslagsbreytingar á heimskautasvæðinu með áherslu á Ísland. Auður hefur mikla reynslu úr háskólaumhverfinu og úr stjórnsýslunni, en hún hefur m.a. starfað við meistaranámsleið í umhverfisfræðum við Háskóla Íslands, sem sérfræðingur hjá umhverfisráðuneytinu og ráðgjafi á sviði umhverfismála auk þess að sinna störfum fyrir íslensku friðargæsluna á Sri Lanka og á Balkanskaganum.