Bjarni M. Jónsson, meistaranemi í haf- og strandsvæðstórnun við Háskólasetur Vestfjarða hefur undanfarin misseri í tengslum við meistaraverkefni sitt kannað fýsileika þess að virkja sjávarföll í nokkrum innfjörðum Breiðafjarðar. Gerði hann ítarlega mælingu á magni og dýpt sjávar í þessum fjörðum með það í huga að meta aflið sem virkja mætti samhliða þverbrúun fjarðarins og er hugmyndin sú að sameina brúargerð og virkjun í eina framkvæmd. Leiðbeinandi Bjarna er prófessor Þorsteinn Ingi Sigfússon, forstjóri Nýsköpunarmiðstöðvar Íslands.

 

Bjarni hefur reiknað afl sjávarfalla fyrir nær alla innfirði og kom í ljós að hámarksafl í Dýrafirði yrði 10 MW, Mjóafirði 14 MW, Kolgrafarfirði 50MW og Gilsfirði 100 MW. Samkvæmt útreikningum hans gæfi þverbrú í mynni Þorskafjarðar og aðliggjandi fjörðum hámarksafl 180 MW. Raunafl virkjunar á útfalli gæti orðið á bilinu 75-80 MW og væri um að ræða afl sem er lotubundið, útreiknanlegt og nákvæmt langt fram í tímann.

 

Í samvinnu við Atvinnuþróunarfélag Vestfjarða, Nýsköpunarmiðstöð Íslands, Orkubú Vestfjarða og Vegagerðina undirbýr Bjarni nú stofnun sprotafyrirtæki sem þróa mun frekar þessa virkjunarhugmynd. Hefur fyrirtækið fengið vinnuheitið Vesturorka-WesTide. Var þetta tilkynnt á kynningarfundi sem haldinn var í háskólasetrinu 27. nóvember s.l.

 

Þess má einnig geta að Atvinnuþróunarfélagið veitti í mars s.l. Bjarna rannsóknarstyrk til að rannsaka hafstrauma sem mögulegan orkugjafa og aðstoðaði honum þannig með að ýta þessu verkefni úr vör. Lesa frétt.

 

Nánari upplýsingar um verkefnið veita:
Bjarni M. Jónsson, s.8618007
Þorgeir Pálsson (AtVest), s. 8990020