Á þjóðhátíðardaginn, þann 17. júní síðastliðinn, hélt Háskólasetur Vestfjarða Háskólahátíð á Hrafnseyri í samstarfi við Safn Jóns Sigurðssonar á staðnum. Þetta er í fjórða sinn sem Háskólasetrið heldur slíka hátíð til að fagna útskrift háskólanema á Vestfjörðum.

Í ár útskrifuðust átján nemendur úr meistaranáminu í haf- og strandsvæðastjórnun með MRM gráðu frá Háskólanum á Akureyri. Fjórir meistaranemar voru viðstaddir athöfnina, þau Maik Brötzmann, Sarah Kennedy, Þórir Örn Guðmundsson og Nora Jacobi sem jafnframt flutti ávarp fyrir hönd útskriftarnemanna. Auk meistaranemanna útskrifuðust fjórir fjarnemar frá Háskólanum á Akureyri, þær Jónína Þorkelsdóttir og Sigríður Sigurjónsdóttir með BA gráðu í sálfræði, Arna Grétarsdóttir með BSc gráðu í viðskiptafræði og Edda Björn Magnúsdóttir með B.Ed gráðu en Edda Björg flutti einnig ávarp fyrir hönd fjarnemanna. Auk nemendanna frá HA var Jóhanna Halldórsdóttir kölluð upp á svið en hún útskrifaðist fyrr í mánuðinum með BSc gráðu í viðskiptafræði frá Háskólanum á Bifröst.

Formlega útskrifuðustu meistarnemarnir og fjarnemarnir frá HA þann 15. júní síðastliðinn en allir fengu þeir afhent prófskírteini sín formlega úr hendi Stefáns B. Sigurðssonar rektors HA á Hrafnseyri á Háskólahátíðinni.

Háskólahátíð Háskólasetursins á Hrafnseyri hefur fest sig rækilega í sessi sem fastur liður í starfsemi Háskólaseturs. Sú nýbreytni, sem tekin var upp á síðasta ári, að bjóða öllum vestfirskum útskriftarnemum að taka þátt í athöfninni hefur mælst vel fyrir.

Háskólastur Vestfjarða óskar öllum útskriftarnemum innilega til hamingju með áfangann sem var staðfestur í blíðviðrinu á Hrafnseyri þann 17. júní.