Langar þig til að læra meira? Ef svarið er já, þá er rétti tíminn núna til að kynna sér það námsframboð sem íslenskir skólar bjóða upp á.

Ef hugurinn stefnir á frekara nám en vilji er til að búa áfram í heimabyggð þá gæti fjarnám hentað þér. Íslenskir háskólar bjóða upp á töluvert námsframboð í fjarnámi, bæði í grunnnámi sem og framhaldsnámi.

Misjafnt er milli námsbrauta hvernig námsfyrirkomulagi er háttað í fjarnáminu. Sumar námsbrautir gera ráð fyrir að nemendur stundi námið eingöngu í gegnum tölvubúnað, aðrar gera ráð fyrir notkun á myndfundabúnaði. Sumar námsbrautir gera þá kröfu til nemenda að þeir mæti í námslotur meðan aðrar gera kröfur um slíkt. Nám er í vissum tilfellum háð því að ákveðinn fjöldi náist í námshópa og ræðst þá staðsetning af myndfundabúnaði og nemendahópi.

Vert er að nefna að ef tilskilinn fjöldi næst hér á Ísafirði, mun fjarnám í hjúkrunarfræði fara af stað næsta haust frá Háskólanum á Akureyri. Mikill áhugi virðist vera á náminu og hafa nú þegar 17 aðilar haft samband við Háskólasetur og lýst yfir áhuga.

Nokkuð svipað námsframboð er í boði næsta vetur og undanfarin ár, en þó er vert að nefna nýja námsbraut frá Háskólanum á Bifröst, en þeir ætla nú að kenna í fjarnámi námsbrautina HHS - Heimspeki, hagfræði og stjórnmálafræði til BA gráðu.

Inn á heimasíðu Háskólaseturs er að finna samantekt á þeim fjarnámsmöguleikum sem íslenskir háskólar bjóða upp á næsta vetur. Hvet ég alla áhugasama um að fara þar inn og skoða námsframboðið og minni um leið á að umsóknarfrestur í framhaldsnám rennur í flestum tilfellum út 15. apríl á meðan umsóknarfrestur í grunnnám rennur út 5. júní.